गोरखामा काङ्ग्रेसका क्रियाशील सदस्य सात हजारबाट बढेर बाह्रहजार पुग्यो

गोरखामा नेपाली काङ्ग्रेसका क्रियाशील सदस्य संख्या १२ हजार दुईसय १५ पुगेको छ । यसअघिको १३ औँ जिल्ला अधिवेशनमा सातहजार सदस्य संख्या रहेकोमा चौधौँ अधिवेशनमा पाँच हजार भन्दा धेरै बढेको जिल्ला पार्टी कार्यालयले जनाएको छ ।
क्षेत्र नं. १ मा ६,६९५ क्रियाशील सदस्य छन् भने क्षेत्र नं. २ मा ५,५२० जना क्रियाशील सदस्य रहेका क्षेत्रीय पार्टी कार्यालयले जनाएको छ । क्षेत्र नं. १ मा तीनहजार ९१ जना नयाँ सदस्य छन् भने तीनहजार छसय चार जना पुराना सदस्यले नवीकरण गरेका क्षेत्रीय सभापति धिरन थापाले जानकारी दिए ।
थापाका अनुसार सबैभन्दा धेरै गण्डकी गाउँपालिकामा चौधसय छ जना क्रियाशील सदस्य छन् । त्यस्तै भीमसेन थापा गाउँपालिकामा तेह्रसय असी जना, गोरखा नगरपालिकाको वडा नं. १ देखि ७ सम्म एकहजार ५३ जना, शहीद लखन गाउँपालिकामा नौसय ८८ जना, आरुघाट गाउँपालिकामा नौसय ७९ जना, चुमनुब्री गाउँपालिकामा चारसय दुईजना छन् भने धार्चेमा तीनसय ८२ जना क्रियाशील सदस्य रहेका छन् ।
त्यस्तै क्षेत्र न दुईमा पच्चीसय १४ जना पुराना सदस्यले नवीकरण गरेका छन् भने तीनहजार छ जनाले नयाँ क्रियाशील सदस्यता लिएका छन् । क्षेत्रीय सभापति गोविन्द गुरुङका अनुसार सबैभन्दा धेरै पालुङ्टार नगरपालिकामा चौधसय ६२ जना क्रियाशील सदस्य रहेका छन् । त्यस्तै सिरानचोक गाउँपालिकामा तेह्रसय ८९ जना, अजीरकोट गाउँपालिकामा एकहजार ९२ जना, बारपाक सुलीकोट गाउँपालिकामा आठसय २७ जना, र गोरखा नगरपालिकाको वडा नं. आठदेखि १४ सम्म सातसय ५० जना क्रियाशील सदस्य रहेका छन् ।
काङ्ग्रेसले आउँदो भदौको १६ गतेदेखि १९ गतेसम्म केन्द्रीय महाधिवेशन गर्दैछ । त्यसअघि भदौको १ र २ गते प्रदेश समितिको अधिवेशन, त्यसअघि साउन २६ गते जिल्ला अधिवेशन हुदैछ । जिल्ला अधिवेशनअघि साउन २३ गते प्रतिनिधिसभा क्षेत्रीय अधिवेशन र २० गते प्रदेश सभाको क्षेत्रीय अधिवेशन हुने भएको छ । त्यस्तै पालिका कमिटीहरुको अधिवेशन साउन १६ गते हुदैछ भने वडा कमिटीको अधिवेशन साउन १२ गते हुदैछ ।
यसपटकदेखि नेपाली काङ्ग्रेसको जिल्ला कार्यसमितिको निर्वाचनका लागि मतदान पालिकाबाटै हुने भएको छ । पालिकाभित्रका क्षेत्रीय प्रतिनिधिहरुले आ–आफ्नै पालिकामा रहेर मतदान गर्ने व्यवस्था मिलाइएको क्षेत्रीय सभापति धिरन थापाले जानकारी दिए ।
१४ औँ महाधिवेशनका लागि गत असोज महिनादेखि काङ्ग्रेसले क्रियाशील सदस्यता वितरण तथा नवीकरण कार्य सुरु गरेको थियो ।साभारः दरौँदी दैनिक पत्रिका