असार १७, गोरखा । गोरखामा असार २० गतेबाट कोरोना विरुद्धको खोप भेरोसेलको दोस्रो डोज लगाईने भएको छ । जिल्ला स्तरीय कोभिड १९ खोप समन्वय समितिको आज बसेको बैठकले जिल्लामा यसअघि भेरोसेलको पहिलो डोज खोप लगाएकालाई असार २० गतेदेखी साउन ७ गतेसम्म खोप लगाउने निणर्य गरेको हो ।
जेठ २५ गतेदेखी खोप लगाएका जिल्लाका ६२ देखि ६४ बर्ष उमेरका नागरिकलाई दोस्रो डोज खोप लगाईने जिल्ला स्वास्थ्य कार्यालय गोरखाका कोल्डचेन निरीक्षक ऋषिराम खत्रीले बताउनुभयो । कार्यालयका अनुसार जिल्लाका विभिन्न पालिकामा यो उमेर समुहका ३ हजार ४ सय ८८ जनाले पहिलो डोज लगाईसकेका छन् । उनिहरुलाई दोस्रो डोजको खोप लगाईने भएको हो ।
जसअनुसार गोरखा नगरपालिकामा असार २४ गते, पालुङटार नगरपालिका र गण्डकी गाउँपालिकामा असार २३ गते, सिरानचोक गाउँपालिकामा साउन ५ गते, शहिद लखन गाउँपालिकामा असार २० गते, भिमसेन थापा, अजिरकोट र बारपाक सुलिकोट गाउँपालिकामा असार २२ गते, आरुघाट गाउँपालिकामा साउन ७ गते, र धार्चे गाउँपालिकामा असार २५ गते खोप अभियान सञ्चालन हुने स्वास्थ्य कार्यालयले जनाएको छ । भेरोसेलको दोस्रो डोज लगाउनका लागि हाल कार्यालयमा ३ हजार ४ सय ८८ डोज खोपसुरक्षित रहेको कोल्डचेन निरीक्षक खत्रीले बताउनुभयो ।
जिल्लाका लागि थप २२ सय डोज खोप पनि प्राप्त भएको उहाँको भनाई छ । खोप लगाउन छुटेका ६० बर्ष माथिका नागरिकलाई सो खोप लगाउने कार्यालयको तयारी छ । प्राप्त खोप औसत संख्याका आधारमा सबै पालिकामा वितरण गर्ने खत्रीले बताउनुभयो ।
यसैबिच, चुमनुब्री गाउँपालिकाको १८ बर्ष माथिका सबै नागरिकलाई भेरोसेल खोप लगाउने तयारी भएको छ । यसअघि सो पालिकाका ५५ बर्षदेखी माथिका नागरिकलाई खोप लगाईएको थियो । अब १८ बर्षदेखी ५४ बर्षसम्मका सबैलाई खोप लगाउने तयारी भएको कोल्डचेन निरीक्षक खत्रीले बताउनुभयो । कार्यालयका अनुसार चुमनुब्रीमा सो उमेर समुहका ३७ सय ८ जना छन् । तर पहिलो चरणमा ३ हजार डोज खोप पठाईने कार्यालयले जनाएको छ ।
भौगोलिक विकटता र सडक सञ्जालसँग नजोडिएको चुमनुब्रीमा बर्षाका कारण पदमार्ग पनि अबरुद्ध भएको छ । त्यसैले खोप ढुवानीको लागि हेलिकोप्टरको विकल्प छैन । चुमनुब्रीमा खोप पुर्याउन हेलिकोप्टर ब्यबस्थापनका लागि गण्डकी प्रदेश स्वास्थ्य मन्त्रालय र विभिन्न संघसंस्थालाई आग्रह गरिएको स्वास्थ्य कार्यालय गोरखाले जनाएको छ । खोप ढुवानी निश्चित भएपछि खोप लगाउने मिति तय गरिने कार्यालयका कोल्डचेन निरीक्षक खत्रीले बताउनुभयो ।साभारः च्वाईस एफ एम