गोरखा ।
गोरखा दरवार पुननिर्माणका क्रममा छाना छाउने काम सकिएको छ । असार पहिलो साताबाट शुरु भएको छानामा झिँगटी लगाउने काम आज सकिएको गोरखा दरवार हेरचाह अड्डाका प्रमुख हरिप्रसाद भुषालले बताउनुभयो ।
असार ४ गतेबाट छाना छाउने काम शुरु भएको थियो । छानामा झिँगटी छाउनका लागि काठमाण्डौंबाट आएका दक्ष कालिगढ सहित १५ जनाभन्दा बढी कामदार खटिएका थिए । छाना छाउने कामसँगै तेस्रो तल्लाको बरण्डामा आँखिझ्याल राख्ने काम पनि अन्तिम चरणमा पुगेको उहाँले जानकारी दिनुभयो ।
यी काम सकिएपछि दरवारको बाहिरी स्वरुपको सबै काम पूरा हुने भुषालले बताउनुभयो । त्यसपछि भित्री काम गर्ने तयारी छ । दरवारको भुईको पूर्व, उत्तर र दक्षिणको भागमा पेटी बनाउने, हरेक तलामा तेलीया इँट्टा लगाउने र गाह्रोमा सुर्की, चुनाको लेप लगाउने काम बाँकी रहेको छ ।
वर्षाका कारण गाह्रो चिसो भएकाले सुर्की र चुनाको काम भने असोजतिर मात्रै गर्न सकिने पुरातत्व विभागबाट दरवार पुननिर्माणमा खटिनुभएका प्राविधिक नारायण बोहोराले बताउनुभयो । झ्यालढोकामा खापा हाल्ने र कोठा विभाजन गर्ने काम पनि बाँकी छ । हालसम्म दरवार पुननिर्माणको करीव ९० प्रतिशत काम सकिएको हेरचाह अड्डाका प्रमुख भुषालले बताउनुभयो ।
२०७२ साल बैशाख १२ गतेको भूकम्पले गोरखा दरवारमा क्षति पुर्-याएको थियो । पुननिर्माणका लागि २०७४ सालको कात्तिकमा पचली भैरव/सिभाको जेभी नामको ठेकेदार कम्पनीसँग सम्झौता भएको थियो । पुननिर्माणका लागि ठेकेदार कम्पनीसँग ४ करोड ३७ लाख रुपैयामा ठेक्का सम्झौता भएपनि भेरिएसनपछिको लागत ४ करोड ९५ लाख रुपैयाँ पुगेको छ ।
ठेक्का समझौता अनुसार गत वर्षको मंसीरमै पुननिर्माणको सकिनु पर्ने भएपनि निर्धारित अवधीमा आधा काम पनि पूरा भएन । त्यसयता ६/६ महिना गरेर तीन पटक म्याद थप भैसकेको छ । गत मंसीरमा दोस्रो पटकको म्याद पनि सकिएको हो । निर्माण ब्यवसायीले माग गरे अनुसार ६ महिनाको म्याद थपेर गत जेठमा काम सम्पन्न गर्न भनिएपनि ढिलाई भएको पुरातत्व विभागले जनाएको छ । सार्वजनिक खरीद ऐन अनुसार गत पुषबाट ठेकेदारलाई दैनिक जरिवाना लगाएर काम गराइएको विभागका प्राविधिक नारायण बोहोराले बताउनुभयो ।साभारः च्वाईस एफ एम