गोरखाको प्रसिद्ध धार्मिक स्थल गोरखनाथ मन्दिरमा बुधवारदेखि सवालाख रोट महोत्सव सुरु भएको छ ।
सिद्धाश्रम शक्ति केन्द्रको आयोजनामा हरेक वर्ष चण्डिपूर्णिमाको दिन देखि ११ दिन सम्म चल्ने रोट महोत्सवको कोरोना प्रभावका कारण रौनक भने छैन । यस वर्ष नित्यपुजा अन्र्तगत रोट चढाइएको केन्द्रका केन्द्रिय अध्यक्ष रामजी अर्यालले बताए ।
गत वर्षदेखि कोरोनाको प्रभावले रोट महोत्सव समान्य रुपमा गरिएको दरबार हेरचाह अड्डाका प्रमुख हरिप्रसाद भुषालले बताए । ‘आन्तरिक रुपमा मात्रै रोट चढाईन्छ, भक्तजन आउने, रोट चढाउने काम बन्द गरिएको छ’ उनले भने ।
राजा पृथ्वीनारायण शाहका गुरु गोरखनाथ प्रकट भएको दिनको रुपमा हरेक वर्ष सिद्धाश्रम शक्ति केन्द्रले बैशाख पूर्णीमादेखि ११ दिन सम्म रोट चढाउँदै आएको छ ।
‘यस अघिको १६ औँ वर्षमा सर्वसाधारण भक्तजनले पनि रोट अर्पण गर्नुहुन्थ्यो’ सिद्धाश्रम शक्ति केन्द्रका केन्द्रिय संयोजक रामजी अर्यालले भने ‘गत र यो वर्ष नित्यपुजा अन्र्तगत रोट चढाएर परम्परालाई निरन्तरता मात्रै दिएका छौँ।’
गोरखनाथ र गोरखकाली मन्दिर परिसरमा भजन, कृतन, पुजापाठ गरेर सयौँ भक्तजनको उपस्थितीमा हुने रोट महोत्सव कोरोना प्रभाव र निषेधाज्ञाको असरले केही रौनक छैन ।
बिगतका वर्षमा सदरमुकाम देखि रथ बोकेर गोरखनाथ मन्दिर लगिन्थ्यो । यस वर्ष कलशयात्रा, रथयात्रा केही भएन । बिगतका वर्षमा २० हजार भन्दाबढिले रोट महोत्सव अवलोकन गरेको दावी केन्द्रको छ ।
गोरखनाथलाई सबैभन्दा बढि मनपर्ने भएकाले रोट चढाएर खुसी बनाउन सकेमा कुनै संकट आई नपर्ने धार्मीक मान्यता छ । गहुँ, जौ र धेरैजसो चामलको पिठो रोट बनाउन प्रयोग गरिन्छ । बिभिन्न ५२ थरीका शक्तिबर्दका मसला मिसाएर रोट बनाईन्छ ।
रोटमा जाईफल, काजु, ल्वाङ, सुकुमेल, दाख, चिनी, खुदो, नरिबल जस्ता किसमिस मिसाईन्छ । नाथहरु शुद्ध भई पिठोमा किसमिस मिसाएर रोटलाई स–सना गोली बनाउँदै घ्यूमा पोल्ने गर्छन ।
फाईल फोटो
स्रोत : daraundi.com