हराएकी महिलाको शव भेटियो

२०६८ फागुन ५ गते, शुक्रवार १६:५६:१३ बजे

नरहरी सपाकोटा , हाम्रो गोरखा संवाददाता, गोरखा

माघ १९ गते देखि हराएकी मनकामना गाविस ५ डाँडापाखाकी तुलकुमारी थापा बिहिवार मृत अवस्थामा भेटिएकी छिन । 
आँवुखैरेनीको मस्र्याङदी जलविद्युत परियोजनाको जलाशयमा उनको शव भेटिएको हो । थापाको विहिवार विहान १० बजे जलाशयमा भेटिएको इलाका प्रहरी कार्यालय आँवुखैरेनीले जनाएको छ । शव सडेगलेको अवस्थामा भेटिएको छ । 
 जलविद्युत परियोजनाका कर्मचारीले शव देखे पछि प्रहरीलाई खबर गरेका थिए । शव पोष्टमार्टमका लागि दमौली अस्पताल पठाइएको छ ।
माघ १९ गते अकला मन्दिर हिडेकी  तुलकुमारी घर नफर्के पछि छोरी अमृता थापा मगरले मनकामना प्रहरी चौकीमा खोजीका लागि निवेदन दर्ता गराएकी थिइन् । उनले २७ गते निवेदन दिएकी हुन् ।  प्रहरीले घटनाबारे अनुसन्धान भई    रहेको जनाएको छ ।