सिण्डिकेट अन्त्यको माग गर्दै यातायात बन्द

२०६८ फागुन ५ गते, शुक्रवार १६:५१:०२ बजे

नरहरी सपाकोटा , हाम्रो गोरखा संवाददाता, गोरखा

यातायात व्यवसायी समिति गोरखाले कच्ची सडकमा सिण्डिकेट लगाएको र सिण्डिकेट लगाउन प्रशासनले सहयोग         गरेको भन्दै पृथ्वीराजमार्ग बस संचालक समितिले विहिवार आफु मातहतका सवारी साधन चलाएनन् ।
सरकारले सिण्डिकेटको अन्त्य गरेपनि गोरखामा सिण्डिकेट कायम रहेको छ । कच्ची सडकमा गोरखा यातायातले एकलौटी ढङ्गबाट यातायातका साधन संचालन गर्दै आएका छन् । पृथ्वी राजमार्गले बुधबार गोरखाका आफ्नो टिकट काउण्टरमा ताला लगाएर यातायात बन्दको आव्ह्रान गरेका हो । बन्दका कारण विहिवार विहानै देखि पृथ्वीमा आबद्ध लामो तथा छोटा दुरीका कुनै पनि सवारी साधन संचालन भएका छैनन् ।
‘गोरखाका कच्ची सडकमा रहेको सिण्डिकेटको विरोधमा आफ्ना सवारी साधन नचलाएका हौँ ।’ पृथ्वीका कोषाध्यक्ष योगेन्द्र केसीले भने ।, ‘सिण्डिकेट हटाउन प्रशासनले असहयोग गरेकाले बन्द आव्हान गर्न बाध्य भएका हौँ ।’
पृथ्वीले पटक पटक कच्ची सडकमा यातायात संचालन गर्ने प्रयास गरेपनि गोरखा यातायातको अवरोध पछि आफ्ना यातायातका साधन संचालन गर्न सकेको छैन । आन्दोलनका कार्यक्रम अनुसार शुक्रबारबाट भाडाका सवारी साधनहरु अनिश्चितकालिन बन्द गरिने केसीले बताए । बन्दका    कारण गोरखाबाट काठमाडौँ,   नारायणगढ, पोखरा र आँबुखैरनी जाने कुनै यातायात छुटेनन् ।   गोरखा यातायातका सवारी साधन भने भने संचालन भएका थिए ।